International Service
Services for international patients living outside the Faroe Islands such as tourists, sailors and others
Careers
Persuing a career in a Scandinavian Hospital

Sjúklingar oftast innlagdir við lungnabruna og bløðrubruna / nýrnakokubruna

8. JANUAR 2019

Ein nýggj granskingargrein um mikrobiologiskar orsøkir og sløg av infektiónum hjá føroyskum sjúklingum við innleggingarkrevjandi sjúku er júst útgivin sum open acess grein í vísindaliga tíðarritinum BMC Infectious Diseases.

Her verður greinað, hvørjar bakteriur eru orsøkin til infektiónir og hvørji sløg av infektión  sjúklingar innlagdir á medisinsku deild í Føroyum hava.

Greinin eitur Focus of Infection and Microbiological Etiology in Community-Acquired Infections in Hospitalized Adult Patients in the Faroe Islands”, og kann lesast sum open access grein her

Greinin er partur av ph.d.-verkætlanini hjá Mariju Todorovic Markovic, 1. hjálparlækna, sum er innskrivað sum ph.d.-lesandi á Syddansk Universitet. Hon skal verja ph.d. ritgerð sína í Kongshøll í Tórshavn hósdagin 28. februar 2019 kl. 14.

Høvuðsvegleiðari er Shahin Gaini, ph.d. og yvirlækni í infektiónsmedisini, sum er knýttur at Landssjúkrahúsinum, Fróðskaparsetur Føroya og Syddansk Universitet.

Hjávegleiðarar hava verið Court Pedersen, professari í infektiónsmedisini dr.med. á Odense Universitetshospital/Syddansk Universitet, Magnús Gottfredsson, professari í infektiónsmedisini ph.d. á Landspitali Universitetssjúkrahús/Háskóla Islands og Mirjana Todorovic Mitic, lækni frá Onkologisku deild, Nis Clinical Center, Nis, Serbia.

Hesi eru øll viðhøvundar á greinini.

Shahin Gaini sigur soleiðis um greinina:

“Greinin hevur nágreinað í æsir, hvørjar bakteriur og aðrar smáverur eru orsøk til innleggingarkrevjandi infektiónir í Føroyum. Greinin hevur eisini nágreinað, hvørji sløg av brunum og hvar í kroppinum brunin situr, tá føroyskir sjúklingar verða innlagdir á Landssjúkrahúsinum við álvarsligari infektión.

Úrslitini vísa, at lungnabruni og bløðrubruni/nýrnakokubruni eru tær vanligastu infektiónirnar hjá føroyskum sjúklingum, sum verða innlagdir á medisinsku deild á Landssjúkrahúsinum.

Gram-negativar bakteriur sum til dømis kolibakteriur (Escherichia coli) eru tær vanligastu sjúkuelvandi bakteriurnar hjá innløgdum sjúklingum á medisinsku deild á Landssjúkrahúsinum.

Úrslitini skulu brúkast til at dimensionera tað føroyska heilsuverkið í mun til infektiónsbyrðuna í føroyska heilsuverkinum og til at velja tey røttu antibiotikasløgini, tá man viðger infektión á føroyskum sjúkrahúsum.

Úrslitini vísa eisini, at tað er tørvur á at betra um mikrobiologiskan diagnostikk í Føroyum bæði viðvíkandi laboratoriutøkni serliga innanfyri PCR tøkni til andaleiðsinfektiónir og økja um bioanalytikaramanningina á Landssjúkrahúsinum.

Kanningin stuðlar eisini undir tilmælini frá frágreiðingini “Virkisætlan fyri mótstøðuføri fyri antibiotika í heilsuverkinum í Føroyum”  har fakliga tilmælið er, at økið við infektiónsmedisin í Føroyum verður styrkt munandi.

Ein vísindalig grein íroknað dátur um deyðatøl (mortalitet) við sepsis í Føroyum væntast publiserað primo 2019.”

Les um ph.d.-verkætlanina hjá Mariju Todorovic Markovic, sum er stuðlað úr Granskingargrunninum, her 

kelda: gransking.fo

Vision

Get the latest news from Landssjúkrahúsið

J.C. Svabosgøta 41-49
100 Tórshavn
ls@ls.fo
Tel. +298 30 45 00
Fax +298 31 74 31
V-tal 345334
EAN5797100000058
Our aim is to offer the Faroese population and international patients a high quality health service in as many areas as possible. In those areas of health care where the hospital is not specialised, our aim is to offer patients the best possible treatment through close co-operation with other hospitals in the Nordic region.